Minisitiri w’Ubitegetsi bw’Igihugu (MINALOC) Hon. Habimana Dominique, yasuye Ibitaro bya Rilima, ROSH, Ste Marie bizobereye mu kuvura ubumuga bw’amagufwa n’ingingo biri mu Karere ka Bugesera.
Urugendo rwa Minisitiri w’Ubutegetsi bw’Igihugu wari kumwe na Guverineri w’Intara y’Uburasirazuba, Bwana Pudence Rubingisa, rwabaye ku wa Gatanu, tariki 03/9/2025.
Aba bayobozi basuye ahatangirwa Serivisi zinyuranye z’Ibitaro, babona uko zikora. Bagaragaje ko bishimiye uko basanze Serivisi zikora, bakaba by’umwihariko batinze mu byumba bikorerwamo insimburangingo n’inyunganirangingo (Prosthetics & Orthotics) n’ahakorerwa ubugororangingo (Physiotherapy).
Baganiriye n’Ubuyobozi bw’Ibitaro ku bijyanye n’icyerekezo bufite cyane cyane ku myubakire yabyo mu gihe biri mu gace gakikije Ikibuga Mpuzamahanga cy’Indege gishya cya Kigali.
Abayobozi b’Ibitaro bya Rilima, ROSH, Ste Marie babwiye Minisitiri w’Ubutegetsi bw’Igihugu, ko Ubuyobozi bukuru bw’Ibitaro bukuriwe na Nyiricyubahiro Antoine Cardinal KAMBANDA buri kubyigaho kugira ngo haboneke ahantu hakwiye bizimukira, ndetse n’ubushobozi bwo kubyubaka.
Ibitaro bya Rilima ni ivuriro ritanga serivisi zihariye z’ubuvuzi bw’ubumuga bw’amagufwa hamwe n’iz’ubugororangingo guhera mu mwaka wa 1999. Ibi Bitaro byahawe izina rya RILIMA ORTHOPEDIC SPECIALIZED HOSPITAL, Sainte Marie (ROSH, Ste Marie) risimbura iryahozeho rya Centre de Chirurgie Orthopédique Pédiatrique et de Réhabilitation, Sainte Marie de Rilima (CCO Rilima) ni ibya Kiriziya Gatolika, Arkidiyosezi ya Kigali.
Biherereye mu Mudugudu w’Amizero, Akagari ka Kimaranzara, Umurenge wa Rilima, Akarere ka Bugesera, Intara y’Iburasirazuba, kuri km 50 uvuye mu Mujyi wa Kigali.
